Hjartagallinn og aðgerðin núna!

Bjarki fæddist með hjartagalla sem kallast Truncus arteriosus og er í meginatriðum það að ósæðin (aorta) og lungnaslagæðin (pulmonary artery) koma sem ein æð frá hjartanu í stað tveggja. Ýmsar tilbrigði eru til af þessum galla, og Bjarki hafði einnig gat á milli gátta (atria) og slegla (ventricle) sem er frekar algengt og svo var hann með rof á ósæðinni sem er sjaldgæfara. Í fyrstu aðgerðinni hans voru götin á milli hólfanna lokuð, rofna ósæðin var tengd saman og sett var inn ný æð fyrir lungnaslagæðina. Truncusinn, eða sameiginlega æðin sem var til staðar stendur þá sem ósæðin.
Nýja æðin sem var sett inn kemur frá öðrum einstakling, en er verkuð þ.a. hún er ekki lifandi, og vex þ.a.l. ekki með honum. Inní þessari æð eru líka hjartalokur, sem verða lekar þegar æðin verður of lítil. Núna stendur til að skipta um þessa æð hjá Bjarka, því lekinn er orðinn það mikill að hægri slegillinn er orðin of stór. Þetta er aðgerð sem við vissum alltaf að þyrfti að gera og tímasetningin er ráðin af stærð hægri slegilsins, en hún var mæld í MRI rannsókn sem Bjarki fór í nýlega. Þetta er gert áður en lekinn fer að hafa áhrif á “starfsgetu” hjartans, og því finnur Bjarki ekki fyrir neinum einkennum af þessu.
Þetta kallast opin hjartaaðgerð þar sem farið verður í gegnum bringubeinið til að skipta um þessa lungnaslagæð og sett verður inn annað hvort gerviæð eða æð úr öðrum eintaklingi. Þessi æð er þó miklu einfaldari og minni umfangs en fyrsta aðgerðin sem hann fór í. Hún tekur ca 3 klst, honum verður þó haldið sofandi á gjörgæslu í 12-24 klst á eftir og verður svo ca 2 daga á gjörgæslu. Ef allt fer að óskum má reikna með að sjúkrahúsvistin verði ca 7-10 dagar. Bringubeinið er svo aðal endurhæfingafaktorinn, og tekur það um 6 vikur að gróa, en Bjarki verður komin samt vel á ról og væntanlega í skólann aftur talsvert fyrr, þó hann megi ekki fara strax aftur í íþróttir og hamagang.

 Aðgerðin verður þann 24.september, á Children´s Hospital í Boston.